Lai Baibal Thiang campaign

Source: CIM le Laiforum Mail on 23 April 2009 Akong: Lai Bible Thiang Campaign Dawtmi nu le pa, u le nau hna, 23rd February, 2009 I kan Committee meeting nih kan khiah bantukin Aizawl i Laimi Khrihfabu a simi Bethel Baptist Church, Carson Baptist Church le Immanuel Baptist Church ah Lai Baibal Thiang campaign ngeih kan  tim. A ccan ding ahcun 26th April, 2009(Sunday zingpumh) ah siseh kan ti. Cuka i kan phawt dingmi ca kan van in kuat ve hna. Ruthi pa, Aizawl Lai Baibal Thiang Campaign           Ahmasain Zumtu nu le pa nan dihlak tein kan Bawipa Jesuh Khrih min le "Lai Baibal Thiang Namtthannak Committee-Aizawl" minin nan kut kan in tlaih hna.   Lai Baibal hi kan Siangbawite an phanh kaa in an rak tuaktan cawlhmi thil a si, a hnu kum '80',  1978 ah Lai Baibal Thiang (Biakam Hlun le Biakam Thar) cu Khrihfabu sinah cawk le rel khawh awkin a hung phan kho ve. A kan dawtu Pathain le kan Siangbawi vialte  le Baibal a lettu vialte chungah lunglomhnak tampi kan ngei.               Kan theih cio bang Kawlram ah Baibal namter khawh a si lo caah Lai Baibal Thiang hi India le Indonesia ah namter an si tawn. Atu ah cun Laimi hi Khrihfa kan si dih ngawt cang, cun a milu in kan karh chin ve lengmang, kan Lai  khualipi '2' a simi Hakha le Lawngtlai ah minung 20,000 hrawng veve um a si cang. Cun kaa dangdang Kalaymyo, Mandalay, Yangon, Aizawl, New Delhi le ramdangchin Malaysia, USA etc tiang zongah Laimi thong tampi pem le khuasak a hung si. Laiholh zong Laitlang pumpuluk le Laimi umnak paoh i holh hman cemmi tlang-holh(common language) ah a hung cang chin ve lengmang fawn.   Kan umnak cio le rian kan ttuannak hmun le hma cio ah kan tlau lonak ding le amah Pathian kan i tlaih pengnak ding ca le pumkhat kan si pengnak ca i kan herh bikmi cu Pathian Bia- Baibal hi a si. Laiholh a hmangmi(Lai speaking people) minung sing hnih(2,00,000) caah zeitindah Lai Baibal an ngeih khawh cionak lai khua kan khan ning a si lai? Kawlram ah le Baibal namter(print) khawh a si fawn ttung lo! Lam a um hnga maw?               Lam a um. Cucu Bible Society of India(BSI) kha "Lai Baibal Thiang rak kan nampiak u" ti i nawl a si, kan cawk i kan phawtzamh(distribut e) khawh zat paoh BSI nih Lai Baibal Thiang hi an kan nampiak khawhmi a si. Zeitlukin dah kan van a tthat! Pathian dawtnak si. Cu rian ttuannak ding caah tiin 19th August, 2001 ah khan Lai Baibal Thiang Namtthannak Committee, Aizawl cu dirh a rak si. Tinhmi '2' a ngei, cu hna cu:- 1) Aizawl khua chungah Lai Baibal Thiang cawk awk um peng dingin khuakhan (Arranging all time availability of Lai Baibal Thiang at Aizawl) 2) Laimi vialte nih Lai Baibal(Lai Baibal Thiang, Biakam Thar le Salm, Ngakchia Baibal etc) an ngeih zawkzawk khawh cionak lai khuakhan, an si. (Arranging means for immediate possession of Lai Baibal Thiang by all Lai  people) Lai Baibal Thiang namter cangmi zat:-   1) Kum 1978 in 1990 tiang BSI nih a nam-mi zat (voi 4).......... uk 25,000 2) Kum 1999 i Indonesian Bible Society nih a nam-mi zat (voi 1)... uk 10,000 3) Kum 2001 in 2009 tiang BSI nih a nam-mi zat (voi 6) .......... uk 32,000 Total........ ......... ...uk 67,000 Kum '31' chung i Lai Baibal Thiang namter cangmi zat cu uk 67,000 a si. Cucu a buaktlak(average) cun kum khat ah uk 2,161 namter khan a si. A tlawm tuk rih. Rian dangdang ttuanmi:-   (i) Ngakchia Baibal(Lai Children's Bible):- Kum 2004 ah khan BSI nih O-21 Programme tangah Ngakchia Baibal lehnak nawl an kan pek ve i Committee nih a leh cawlh ve, July-2005 ah khan release a si, colourful-pictorial a si, Hong kong ah namtermi a si i a quality zong a ttha ngaingai. BSI nih an hal hna bang Laitlang(CACC) kha Ngakchai Baibal uk 5,000 nikum 2008, December thla ah khan a lakin an tthenh hna, kan i lawm tuk cio hna. A man ngaingai cu uk khat ah Rs 320 a si, discount in Rs 200 in an kan cawkter. Cu zong cu kan cawk khawh setsai lo caah BSI-Headquaters Bangalore leiah special discount kan hal tthan hna i uk khat ah Rs 120 in "Ngakchia Baibal" cu a cawk an kan sianh, BSI le Pathian cungah tampi lunglomhnak kan ngei. Cun Committee nih uk 2,000 a cawk ve i atu hi Committee kut ah uk 1,750 hrawng le BSI- Bible House, Aizawl ah uk 1,000 hrawng a um rih ko. Ngakchia Baibal vialte cawknak le phawtzamhnak kongah Pathian sinah thla fak piin cam hna u sih.   (ii) Mary Jones le a Baibal:- Kum 2008 ah khan BSI nih an kan sianh bang Committee nih a lehmi a si, Bangalore ah BSI nih uk 8,000 a namter. September, 2008 ah khan Mary Jones Hall, Bible House, BSI- Aizawl ah release a si. Atu ah uk 700 hrawng lawng a tang cang. Laimi nih Baibal duhnak lei le a phawtzamhnak lei kongkau ah awareness a kan pek kan zumh.   Rianttuanning le hmailei karhlannak ding kong:-   Lai Baibal Thiang namternak, tlanhnak le phawtzamhnak ca ding ah voi(4) tiang Aizawl le ramdang Laimi Khrihfabu le pumpak sinah tangka cawi (le advance ca i tangka kuat chung) a si cang. A dihlak i cawimi zat cu Rs 12,06,826/- a si. Advance ca ding ah BSI ah voi(3) tangka submit a si cang, a dihlak ah Rs 6,20,000/- a si. Baibal tlanh le zuar a si hnuah cawimi kha cham tthan an si tawn.            Laimi hi vawlei cung khuazakip ah kan um dih ngawt ve ko cang. Chungkhar le Khrihfabu  caah thil le ri le tangka tampi kuat le bomh cio a si. Mizoram ummi Laimi nih kan tuaktan khawh vemi, kaa dang le hmun dang i a ummi ca i tuaktan aa relrem tuk lomi thil pakhat a um. Cucu Lai Baibal Thiang namter le phawtzamh hi a si. Aizawl cun Laitlang a nai te, ramdang i carek-in Baibal kuat le a fawi te fawn. Cucaah Laimi dihlak mit-thlam ah cuanter bu-in kan si khawh tawk cio i ttan la cio dingin kan in nawl hna. Laimi vialte nih Baibal an ngeih dih hlan paoh cu i din kho kan si hrim lo. Pathian nih thazaang thar kan pe chin lengmang ko seh. Baibal aa cawk kho ve lomi:- kan hawi le, kan Khrihfabu, kan khua  caah Baibal an ngeih khawh ve cionak lai hmaileiah kar hlang chinchin hna u sih.           Pathian Bia- a karh i mi zakip nih Baibal an ngeih hi Satan nih a duh lo bikmi a si caah, a phunphun in le kan i ruah lo ning pipi in harnak le dohnak zong kan tong chin lengmang ko lai. Baibal nih "Gideon le a mi 300 hna nih Pathian Bia ningin Midian ralkap 1,20,000 le an siangpahrang '2' Zebah & Zalmunna kha an tei hna" tiah a kan chimh. Kanmah lei ah Pathian a um poah ahcun ahohmanh nih hi rian (Baibal namter le phawtzamh) kong ah hin sual an kan phaw kho bal lai lo.   Sawmnak:-   Lai Baibal Thiang Namtthannak Committee hmaileiah kar a hlan peng khawhnak ca le Bible Society of India nih Lai Baibal Thiang tam chinchin a nam khawhnak ding caah Pathian sinah thla fak piin cam zungzal hna u sih. Cun Pathian nih a Bia Thiang kan ngeih zawkzawk khawh cio i kan rel, kan theih khawh cionak lai hi Lai Baibal Thiang namternak le phawtzamhnak rian sung hi thluachuahnak pe zungzal ko seh. Kan i lawm. Lai  Baibal  Thiang Nam\hannak Committee, Aizawl 26th April, 2009 ***