| Laica cu tangli tiang lawng a um ko caah Laica tangli a awngmi paoh nih ceih lulh khawh cio ah ka ruah phot ko i ka hun i thawh phot ve. Laica kan ti lengmang mi hi a ngaingai tiahcun Hakha holh khi a si ko.Cucaah Laica seh kan tial tiahcun aho paoh nih Hakha holh khi kan i cherhchan cio a herh ko rua hnga. Kanmah le kan awcawi cio in kan tial cio ko lai ti siseh law, Matu, Lautu, Zophei, Senthang nih kan awcawi cio kan rak chuahpi ahcun zeitin? Zei a si, ti hmanh kan hngalh hnga mei? Hi kongah a el le a al phunphai in kan ttang ko rih ahcun Laimi cu buai le bai phunphai hrimhrim hi kan uar rumro caah a si, kan ti khawh men ko hnga. Zeicadahtiah, Mirang nih Laica an rak kan serpiak lioah Hakha holh khi an rak i cherhchan mi a si caah a si. Tangli tiang kan rak cawn ciomi Laica hi Hakha holh bak a rak si fawn. "Cepa a le" timi hna kha cu Hakha holh hmanh ah khuahlun holh ti ninglaw ka luan hlei hnga lo pei. Laica tawlreltu CACC Laica cu a dirhmun a fek ve rih lomi a si caah kan Laica dirhmun a feh zau khawh nak ding caah Laica tawlreltu CACC tawlrel ning khi mipi nih kan zulh hna awk le kan pom hna awk hi a biapi ngaingai hnga. CACC nih zei pipa an kan iap kho lo kan ti ahcun kumkhat voili in a chuak lengmang mi Muko Mekazin khi ahopaoh nih i zohchunh cio usih law kan Laica a dam zau ko hnga. Aho chimhmi le cawnpiak mi hmanh ngaih duh loin, mah siarem ning paohin kan ttial lengmang cio rih ko ahcun aho te uico hmanh fial a hau theng ti hnga lo dah. Catialtu min i tel loin Laiforum le Rungcin ah catial khawh siseh law, an catial dan zoh ah "a nih tialmi" tiah minung panga nak tlawm lo hi cu ka tlaih khawh ko hna hnga. Mi timi zulh duh hleng tung loin, mah duhmi lawng dirpi hi "buai" phunkhat a si ve ko. Ca le holh Ca timi ah tialmi ca le holhmi ca tiin holh le ca hi aa then zungzal ( holh phunkip a thiammi ka lo nain, Laiholh hmanh thitha in ka thiam lo ). Bianaah, " Cungpi le Ceupi hi hawikom ttha tak an si. An kum le an khua zong aa khat i, an ngeih le an chiah zong aa tluk. Voikhat cu zu an ding tti i bia an i el. Ceupi a thin a hung i, na neih zat ka neih ve tiah Cungpi kha a hro". Hika zawnah tialmi ca le holhmi ca na hmuh lai. Ceupi a biachim zoh ah Thantlang leimi a si a fiang. Cungpi belte Hakha lei maw Thantlang lei timi na fiang lai lo. Zeicadahtiah, a biachim a lang lo. A sinain, catialtu pa nih Hakha holh "ngeih" a hman i Thantlang holh "neih" a hmang lo. Laica in chuahmi Mekazin paoh ah catialtu a tam deuh hi Thantlang lei mi deuh kan si caah "neih" nih hmunhma a ngeih ngai hi a si rua tiah ka ruah(ka palh kho). Neih lawng hmanh a si loh, ai zong aa tel, kai zong aa tel. Cafang fonh Santleih, ngeihchiat, sihmenhseh, zerhpi ni, zerhte ni......tbt. hi Laiforum le Rungcin ah a tam ngaingai.A biafang fonh cu um ko rih seh. A cafang fonh koko ah Laica hi Laimi nih mai sam in kan sam. Nang na tel ve lai lo maw, ti ding hoi hna khi "Nang na tal ve lai lo maw" tiah hmun tampi ah a lang. Hi hna hi cu Laica a si loh ti ninglaw ka palh tuk hnga lo dah. Laica a poi venak cu duh paoh in tial awk a tha i rel awk zong a tha ve fawnmi hi a si. Bianaah, " Pa Luai cu Kawlram ah nupi aa cah i, a rak phan taktak tikah a nupi nih a duh ti lo, Paluai cu kawl ramah nu pi a cah i arak phan tak tak tik ah a nu pi nih a duh ti lo....tbt. in a phunphun in ttial awk a ttha. A rel zong rel khawh dih a si fawn. Asinain, zohnak ah Laica a umtu ning zong theih khawh a si ve. Cucaah Laica a tlaihchan i Laica tial a huammi paohpaoh nih CACC tining hi i hrawm kho cio usih law, a dir zong kan dirpi cio ahcun a rauh hlanah kan Laica dirhmun a fek ngaingai ko hnga. Perhkalh |
No comments:
Post a Comment